२०७९, पुष ३ गते , काठमाडौं

डिल्लीरमण–कल्याणी रेग्मी पुस्तकालयद्वारा बहुआयामिक व्यत्तित्व स्व. डा. डिल्लीरमण रेग्मीको ११० औं जन्मजयन्ती समारोह शान्ति दिवसका रूपमा विशेष कार्यक्रमका साथ मनाइयो । सो अवसरमा डा. रेग्मीले आफ्नो जीवनकालमा नै शेष पछिको बकसपत्र गरी नेपाल सरकारलाई प्रदान गर्नुभएको ज्ञानोदय आश्रम लाजिम्पाटमा भएको उक्त कार्यक्रममा रेग्मीका राजनितिक, इतिहास लेखन लगायतका बहुमुखी व्यत्तित्वका बारेमा विभिन्न वक्त्ताहरुले प्रकाश पार्नुभएको थियो । पुस्तकालय विकास समितिका अध्यक्ष प्रा.डा ध्रुव कुमार घिमिरेको अध्यक्षतामा सम्पन्न उक्त कार्यक्रममा प्रमुख अतिथि नेपाल ललितकला प्रज्ञा प्रतिष्ठानका कुलपति माननीय के के कर्माचार्य हुनुहुन्थ्यो । पुस्तकालय विकास समितिका सदस्य एवं शिक्षा, विज्ञान तथा प्रविधि मन्त्रालयका सह–सचिव दीपक शर्माको स्वागत मन्तव्य सहित सुरु भएको उक्त कार्यक्रममा पुस्तकालय विकास समितिका पूर्व अध्यक्ष डा. तुलसीप्रसाद भट्टराईले स्वर्गीय रेग्मीका बहुआयामिक व्यक्तित्वबारे प्रकाश पार्नुभएको थियो । सो अवसरमा विशिष्ठ अतिथिका रुपमा बोल्दै त्रि.वि इतिहास संस्कृति विभागकी पूर्व अध्यक्ष प्रा.डा वीणा पौडेलले रेग्मी इतिहासकार मात्र नभई कला पारखी रहेको कुरा उहाँका संकलनमा आएका यसै भवनको प्राङ्गणमा रहेका पञ्चबुद्ध लगायत सूर्यको मूर्तिले पुष्टि गर्दछ भन्नुभयो । सो अवसरमा नेपाल बालसाहित्य समाजको संयोजनमा सुशीला प्रधानाङ्गद्वारा लिखित डा. डिल्लीरमण रेग्मीको बालोपयोगी जीवनीको लोकार्पण गरिएको थियो । पुस्तकालय विकास समितिका निवर्तमान अध्यक्ष इन्दिरा दली, वर्तमान सदस्य डा. अम्विका घिमिरे लगायत पुस्तक र पुस्तकालयलाई माया गर्ने सयौं प्रबुद्व वर्गको समुपस्थितिमा सम्पन्न उक्त कार्यक्रमको सञ्चालन पुस्तकालय विकास समितिका सदस्य सचिव एवं पुस्तकालय प्रमुख भोला कुमार श्रेष्ठले गर्नुभएको थियो ।